Ístaki tamanut ammatitsivoq

Ilulissani erngup nukinganik innaallagissiorfissaa Paakitsumiittoq soqutiginnittunut tamanut sanaartortut Ìstak-ikkut qaaqqusipput ammatitsinissaminnut sapaatiuppat 5. september 2010 nal. 09 – 16.

Ìstak qaaqqusissutiminni nalunaarutigaat takornariartitsissasut. Pulaartut kaffi, the qallersukkanillu sassaalliuffigineqarumaarputtaaq.
   Takornariartut namminneq Paakitsumut ingerlanissartik isumagissavaat. Erseqqissaassutigineqarporlu isumannaatsumik angalanissaq erngup nukinganik innaallagissiorfiliorfimmut angalasup nammineq akisussaaffigaa, Sarfakkut Paakitsullu Ilorliani umiartorneq nalunnginnissaa pingaarpoq.

Erngup nukinganik innaallagissiorfik naatsumik
2010-mi juunimi aallartittumik sanaartortoq E. Pihl & Søn Grønland ApS, Islandimi piginneqatigiit Ìstak aqqutigalugu, Ilulissat avannaanni erngup Nukinganik innaallagissiorfiliussaaq Nukissiorfiit sanaartortitsisoralugit. Sanaartukkamit illoqarfik innaallagialersorneqarlunilu innaallagiatortumik kiassarneqassaaq qaminneqarsinnaasumik.
   Erngup nukinganik innaallagissiorfik 1. november 2012-imi turbinemit siullermit innaallagissiorsinnaalissangatinneqarpoq. Sanaartugaq tamarmi 2013-imi ingerlalissangatinneqarpoq. Ukiumut 65 GWh-nik nukissiorsinnaassaaq (gigawatttimer, 1 GWh = 1.000.000 kWh) taamaalillunilu Nuummi Kangerluarsunnguami erngup nukinganik innaallagissiorfiit annersaasa tullerilissallugu.