INUTEK-ip nukissiorneq sammivaa Marlunngornermi maajip ulluisa 26-anni INUTEK, Kalaallit Nunaanni Teknologiimik ingerlatseqatigiiffik Nuummi Katuami tamanut saqqummiivoq, qulequtaralugu ”Nukissamik ineriartortitsineq – imaluunniit nukissamik pissamaatit qanoq pitsaanerpaamik atorluarneqarsinnaappat? Saqqummiisut pingasuupput tamarmik Nukissiorfimmeersut. Sanaartornermut pisortap Lars Hoffmeyerip erngup nukinga eqqartorpaa. Maanna innaallagissiorfivut pingasut, kiisalu Sisimiuni sisamassaasa sananeqarnera oqaluttuaraa. Aammattaaq siunissami sumi erngup nukinganik innaallagissiorfiliorsinnaanermut periarfissaqarnersoq saqqummiunneqarpoq. Pilersaarusiornermut siuttup Peter Kjeldmannip ungasianit atuaasarneq, pilersaarummut killiffik siammarterinissamullu pilersaarut saqqummiuppai. Tassunga ilanngunneqarput atuisartut internetikkut nittartakkatsinnut isersinnarlutik namminneq atuinerminnik siunissami takunnissinnaalernermikkut nukissiorneq pillugu ilisimanninnerulernissaat. Ineriartortitsinermi siunnersortip Thomas Dan Andersenip H2KT-mik pilersaarut, brintimik ikummatissamillu angallanneqarsinnaasumik pilersitsiviusoq oqaluttuaraa. Tassunga ilanngunneqarput pilersaarut pillugu saqqummiussineq tunuliaqutaalu, killiffia siunissarlu, kiisalu piumasaqaatit suliarinnittussarsiuussinissarlu. Tusarnaartut 50-70-it missaanniipput. Saqqummiinerit tamarmik kingorna tusarnaartut naleqquttunik apeqquterpassuaqarput.
|  |
