Ilulissani erngup nukinganik innaallagissiorfik pillugu paasissutissiilluni ataatsimiinneq

Nukissiorfiit Ilulissani innuttaasunut 10. juni 2010-mi paasissutissiilluni ataatsimiititsivoq. Tamanna Sermermiuni unnukkut pivoq tusarnaariallu 40-t missaanniipput.

Paasissutissiilluni ataatsimiinneq ingerlatsinermut qullersap Niels Pedersenip tikilluaqqusineranik aallarnerneqarpoq sanaartortulerivimmilu qullersaq Lars Hoffmeyer Paakitsumi erngup nukinganik innaallagissiorfissap oqaluttuassartaanik oqaluttuarpoq. Tamatuma kingorna erngup nukinganik innaallagissiorfiit pillugit filmit marluk takutinneqarput. Siulleq tassaavoq Kujataani Qorlortorsuarmi erngup nukinganik innaallagissiorfik pillugu piviusulersaarut. Aappaa tassaavoq nunap iluani qanoq erngup nukinganik innaallagissiorfiliortoqartarneranik Norgemiut animationimik filmiliaat.
  Siunnersorti Henrik Mai Niras Greenlandimeersoq Paakitsup kangerluani erngup nukinganik innaallagissiorfissaq pillugu saqqummiivoq teknikimullu tunngasortaa sammillugu.

Sanaartorfimmi pisortaq Gisli H. Gudmundsson Ístakimeersoq erngup nukinganik innaallagissiorfiliorfimmissamit aallarteriikkamit assinik takutitsivoq. Assini takutinniarneqarpoq umiarsualiveqanngitsumi atortunik assartuineq qanoq pisarnersoq.

Saqqummiussat quppernermi ataani takukkit.

Nuna qeriuaannartoq erngullu nukinganik innaallagissiorfik?
Takkuttut tassaapput najukkami innuttaasut, inuusuttunit utoqqarnut, arnat angutillu. Erngup nukinganik innaallagissiorfiliornertaa kingornalu susoqarnissaa assut soqutigaat. Tusarnaarluartoqarpoq. Tusarnaartunit 30-ngajannik apeqquteqartoqarpoq.

Apeqqutit erngup nukinganik innaallagissiorfissaq pillugu teknikimut tunngasorujussuupput, illutaata suliarinertaanit innaallagissiorfiup qanoq ungasianit aqunneqarnissaanut tunngallutik. Imeqarfiit sullorsualiorfissat saputiliorfissallu kiisalu sermersuarmit iluliaqartumit imermik tigooraanissaq pillugit apeqquteqartoqarpoq.  Aammattaaq nuna qeriuaannartoq, nunarsuarmi silaannaap kiatsikkiartornera Nunatsinnilu sialussaaleqineq Qorlortorsuarmi erngup nukinganik innaallagissiorfimmisulli tatsit paqqernerannik kinguneqarsinnaasoq ilanngunneqarput. Aatsaavissuaq nunap qeriuaannartup ataani erngup nukinganik innaallagissiorfiliortoqalernerani sermersuaq nunalu qeriuaannartoq misissueqqaarnerni qanoq sukumiitigisumik nakkutigineqarsimappat?
  Innuttaasut innaallagiap akiisigut qaqugu iluaquteqalernissaat suliallu qanoq akisutiginera tusarnaartut taamatulli soqutigitigaat. Aammattaaq erngup nukinganik innaallagissiorfiup akilerneqarnissaa naatsorsorneqarsimanersoq, kiisalu innaallagissiorfimmit illoqarfimmut qanoq sivisutigisumik innaallagialersuisoqarsinnaanera apeqqutigineqarput. Erngup nukinganik innaallagissiorfik Nuummi ilaatigut pisartutut anorersuartillugu unittoorsinnaanersoq ilaasa paaserusuppaat.
 Taamaattorli innuttaasut ukiorpassuarni amerlisimanngimmata naammassisaqarpallaarsinnaasumik erngup nukinganik innaallagissiorfiliortoqarnera ernummatigineqarpoq. Kia atussavaa qaqugulu innaallagissiorfik kiassaalissava? Erngup nukinganik innaallagissiorfik qassinut suliffiusinnaanersoq kiisalu entreprenørinut Nukissiorfinnullu tunngatillugu akisussaanermut tunngasut apeqqutigineqarput. Taakkununnga ilanngullugit kia sullissineq erngullu nukinganik innaallagissiorfiup qaqugu Nukissiorfinnut tunniunneqarnissaa apeqqutigineqarput.
 
Apeqqutit tamakku tamarmik Nukissiorfinit, Ístakimit suliffeqarfinniillu siunnersuisartuusunit akineqarput.
 
Naggataatigut inuit paaserusuppaat najukkami innuttaasut innaallagissiorfiliornermut malinnaalaarumallutik Paakitsuliartarsinnaanersut. Tusarnaartut erngup nukinganik innaallagissiorfimmut isumalluarpasipput siunissamilu susoqarnissaa alaatsinaallugu. Ataatsimut isigalugu aaqqissuussineq iluatsilluarpoq.