Ilulissani erngup nukinganik innaallagissiorfeqalernissaq akuerineqarpoq

Nukissiorfiit Ilulissat avataanni erngup nukinganik innaallagissiorfiliornissamut entreprenørit Pihl & Søn A/S isumaqatigiissuteqarfiginissaat Namminersorlutik Oqartussat inaarutaasumik ataasinngornermi februaarip ulluisa aallaqqaataanni akueraat.

Ilulissani innuttaasut aasamit ukiunut tulliuttunut annerusumik sanaartorneq malugissagunarpaat. Tassami Nukissiorfiit illoqarfiup avataani erngup nukinganik innaallagissiorfiliortoqarnissaanik kissaateqarnerat Namminersorlutik Oqartussanit akuerineqarpoq. Erngup nukinganik innaallagissiorfiup Qingua Avannarliup tatsillu Paakitsup Akuliarusersuata akornanni kangerliumarngup eqqaani sumiiffimmi Ilulissat avannamut kitaanni 50 kilometerisut ungasitsigisumi inissinneqarnissaa pilersaarutaavoq.

Februaarip marsillu qaammataasa nikinneranni sanaartortitsisup Nukissiorfiit entreprenøritullu sulliffeqarfiup suliarinnittuusup akornanni isumaqatigiissuteqarnissaq naatsorsuutigineqarpoq. Taamaassappat sulineq 2010-mi juunimi aallartittussatut naatsorsuutigineqarpoq. 

- Erngup nukinganik innaallagissiorfiliornissaq inuiaqatigiit uuliamik pinngitsuuisinnaannginnerulernissaannik qularnaariffigineqarnissaannut eqqortumik iliornerit ilagaat. Suliaq 2013-ip ingerlanerani naammassippat Nukissiorfiit nukissiornerisa 70 %-iisa missaat ataavartumik nukissiornermik tunngaveqarluni pilissaaq – 2008-mi 40 %-iuvoq. Maannalu suliassaq alla aamma suut tamarmik pissusissamisut ingerlassappata 2014-imi aallartinneqartussaq piareersaleruttorparput, nukissiorfiup pisortaa Svend Hardenberg oqarpoq.