Ilaqutariinnut brintip ullua

Kalaallit Nunaanni brintiliorfik siullerpaaq takuuk aammalu brinti atorlugu tusarnaartitsineq tusarnaariarlugu!

Arfininngornermi maajip 29-ani nal. 13-17 Nukissiorfiit brintip ulluanik taallugu pikialaartitsiniarpoq qullersaqarfiup Issortarfimmut 3-p eqqaani.

Brintip ulluanik pilersaarusiornerup siunertarivaa brintiliorfik martsip ingerlanerani Nukissiorfiip qullersaqarfiata silataani inissinneqarnikup Nuummiunut takutinnissaa. Sanaartugaq misileraataavoq brintip siunissami nunatsinni qanoq atorneqarsinnaanera pillugu apeqqummut akissutaasussaq.

Pisussat
Brintip ulluani takutinneqassaaq takornariartinneqarlunilu brintiliorfik soqutiginnittunut, brintimit innaallagissiaq atorlugu tusarnaartitsisoqassaaq Hans Jukku Noahsenimit Nukannguaq Geislerimillu kiisalu assigiinngitsunik soqutiginartunik unammisitsisoqassaaq pilerinartunik pinnatassalinnik. Aamma meeqqanut inuusuttunullu angisuumik pissittaarfiusinnaasumik akisersuaqassaaq kiisalu titartaaffimmik tupermik.