1. marts 2011
Ukiuunerani qaammatini pingasuni unikkallareerluni Ilulissat avannamut kangiannit 50 km-isut ungasitsigisumi Paakitsumi erngup nukinganik innaallagissiorfiliornermik sulineq aallarteqqinneqarpoq.
- Suliffeqarfik decembarip aallartinnerani ukiuunerani matummalli sulisut marluk sanaartorfimmik nakkutilliiuarsimapput, Nukissiorfinni pilersaarummut nakkutilliisuusoq Ole Kristensen oqaluttuarpoq.
Ukioq sermersuarmit anorersuarfiusarsimavoq.
- Februaarip aqqarnanni anorersuarpoq. Entreprenørip kangerluup anigguani usilersoqqittarfia eqqugaanerpaavoq. Tassani containerit sulisut atugaat marlussuit imaanut tingipput annaaneqarlutillu. Sanaartorfimmi ajoqusertoqalaarpoq. Ingerlassissutit assakaasullit marlussuit ujaqqanit tingittunit igalaajarneqarput.
Aallartiaarneq
Maanna sulineq pilersaarutaasumit sapaatit akunnerannik ataatsimik sioqqutsilluni aallarteqqinneqarpoq. Sulisut aqqaneq-marluk februaarip 24-anniilli qaarusuliortut uninngavissaannik piareersaalerput, sulisut taakku ullumikkut takkutissangatinneqarlutik.
- Siullermik nukissiorfittassaanut qaartiterineq naammasseqqaarneqassaaq, taava betonilerineq aallartissinnaanngussaaq, Ole oqaluttuarpoq.
Martsimi, apriilimi maajimilu Paakitsumi sanaartorfimmi sulisut 45-ssangatinneqarput. Nukissiorfimmi betonilerineq aallartippat sulisut amerlineqassapput.
Timmisartuussinerpassuit
Paakitsumi kangerluk sikoqarpoq maajillu qaammataata tungaanut sikoqassagunarluni. Tamatuma tungaanut sanaartorfiliarnissamut periarfissat marluupput. Helikopterertoqarsinnaavoq Sarfamiluunniit kangerluup anigguanut imaatigut ingerlasoqarsinnaavoq tassanngaannillu biilinik snescooterinilluunniit sanaartorfiliartoqarsinnaalluni.
- Apriilip qiteqqunnerani sarfamut sakkortuumut napparutissat siulliit Ilulissanut ilivitsutut tikisinneqassapput. Napparutit eqqaavissuup eqqaanut katersorneqassapput. Tassanngaanniit toqqavissanut ukioq kingulleq suliarineqartunut timmisartuunneqarlutillu ikkussuunneqassapput, Ole nassuiaavoq.
Sulisut 15-20-t napparutinik katiteralutillu ikkussuisuussapput.
Poorskip kingorna Ilulissani Paakitsumit innaallagiamik tigooqqaaviusussamik sakkukillisaaviliorneq aallartinneqassaaq.
