31. maj 2010
Nukissiorfiit sapaatit akunnerisa naaneranni Nuummi brintimut ullorititamik aaqqissuussivoq. 700-t missaanniittut takkupput ilaatigut Kalaallit Nunaanni brintiliorfiit siullersaat takusarlugu, pississaariartorlutik unammeqataajartorlutillu.
Nukissiorfiit Nuummi arfininngornermi maajip ulluisa 29-anni nalunaaqutaq 13.00-17.00 Issortarfimmut 3-mi qullersaqarfiup eqqaani brintimut ullorititaqarpoq.
Brintimik ilisimasaqarnerulerneq
Brintimut ullorititaqarnermi siunertarineqarpoq brintiliorfittaap takutinneqarnissaa innuttaasullu brintimik ikummatissaasivinnillu ilisimasaqarnerulersinneqarnissaat.
Ullup ingerlanerani brintiliorfik takornariartinneqarpoq soqutiginnittut imermit qanoq brintiliortoqararneranik sanaartukkaniittullu ataasiakkaat sumut atorneqartarnerannik oqaluttuunneqarlutik. Tamatuma saniatigut Nukissiorfiit brint pillugu filmiutaannik, biilit brintitortut assingannik mikisumik isiginnaartoqarsinnaavoq misileraalaanermilu brintgassimi nukissaq qanoq annertutiginersoq misigalugu. Inuit soqutiginnittorujussuupput apeqquterpassuaqarlutillu.
Unammisitsinerit
Gassit nukissamillu tunngatillugu aamma meeqqanut inersimasunullu sammisaqartitsisoqarpoq amerlasuut soqutiginnillutik nuannaarlutillu peqataaffigisaannik.
Assersuutigalugu titartaanermik unammisitsisoqarpoq. Nuup ukiut 100-t qaangiuppata qanoq isikkoqarnissaa takorluuiffiulluartunik 223-rsuarnik titartarneqarsimavoq. Taamatuttaaq Nukissiorfiit brintilu pillugit apeqqutinik akisassanik unammisitsisoqarpoq 200-ngajaat peqataaffigisaannik.
Unammisitsinernit marlunnit tamanit peqataasut sapaatit akunneranni tullermi Tiu-Tiumi nalunaarutigineqassapput.
Nukissaq ikumatinneqarpoq
Ullormut sammisat ilarpassui silami pipput, tamatumani amerlasuut Nukissiorfiup sikkiliutaanik brintiliorfittulli Kangerluarsunnguami erngup nukinganik innaallagissiorfimmit nukissamik sinneruttumik avatangiisinut ajoqutaanngitsumik atuisunik innaallagiatortunik misililluutik. Meeqqat meerarpaluttullu aamma ilaatigut pississaarfimmi (gassimik pullatami) nukissaminnik atuinissamut periarfissaqarput.
Tamatuma kingorna Nukissiorfiit kantiinaani nukissaqalernissamut neqerooruteqartoqarpoq kaffillertoqarluni, tamatumani Hans Jukku Noahsen aamma Nukannguaq Geisler avatangiisinut ajoqutaanngitsumik tusarnaartitsillutik. Isiginnaartut nuannaarutigisaannik meeqqat erinarsuutaannit kalaallit erinarsuutaannut ilisimaneqartunut nipilersorput.
Ataatsimut isigalugu ulloq iluatsilluartorujussuuvoq, pulaartut nuannaartut sulisullu naammagisimaarinnittut amerlallutik.
