Brintiliorfiup USA-meersunut takutinneqarnera

Amerikami aallartitaqarfimmeesut marlunngornermi juunip ulluisa 29-anni Nukissiorfiit qullersaqarfianut pulaarput. Pulaarnermi siunertaavoq Nukissiorfiit brintiliorfiat pillugu paasisaqarnissaq.

Amerikami naalakkersuisunit assistentsekretær Dr. Kerri-Ann Jones ilisimatusarnermullu tunngasuni immikkut ilisimasalik Bo Gregersen amerikap Danmarkimi aallartitaqarfianeersoq pulaarput brintiliorfillu pillugu paasisaqarlutik.
   Ineriartortitsinermut siunnersortit Jens Nielsen aamma Jens-Peter Bak Henriksen brintiliorfiup oqaluttuassartaa, tekniki brintiliorfiullu siunissami Kalaallit Nunaanni qanoq atorneqarsinnaanera oqaluttuaraat.
  - Danmarkip, USA-p Kalaallit Nunaatalu akornanni Joint Committeemik suleqatigiinnermut ilaavugut. Tassani brintiliorfik pillugu pilersaarutit aallartinneqarnissaat siusinnerusukkut oqaluuserivarput unitsikkallarneqarpulli. Taava Nukissiorfiit brintiliorfeqartoq tusarparput tamannalu tupaallannarpoq, Bo oqaluttuarpoq.

Siunissamut soqutiginninneq
Illoqarfinni minnerusuni nunaqarfinnilu brintimit nukissap atorluarneqarnissaanut tunngatillugu Nukissiorfiit qaqugu iliuuseqarniarnersut Kerri-Annip soqutigisorujussuuaa. Eqqartuinermi pineqarput brintiliornermi atuinermilu ilisimatusarneq, kiisalu brint pillugu ilisimasanik innuttaasunut, politikerinut soqutiginnittunullu allanut siaruarterineq. Tamatuma saniatigut brintiliorfimmi teknik sumilu ilitsersortittoqarsinnaanera pillugu oqallittoqangaatsiarpoq.

Brintiinnaanngitsoq
Aamma Kalaallit Nunaanni pissutsit eqqartorneqangaatsiarput, tassani avatangiisinut akornutaanngitsumnik allatut nukissiorsinnaaneq eqqartorneqarluni. Kerri-Annip aamma Bop paasivaat Nukissiorfinni qullersaqarfimmut ilassutissamut solcellenik, seqerngup kissaanik geoenergimillu ikkussuinissaq pilersaarutigineqartoq ataavartumik nukissiornerit taama ittut takutinneqarnissaat ilisimalersinneqarnissaallu pillugit.