21. juli 2011
Biilit innaallagiatortut brintilu pillugit Nukissiorfiit marlunngornermi 9. august 2011-mi tamanut ammasunik marlunnik workshopertitsissapput. Kulturikkut illorsuarmi Katuami taakku immikkut pissapput.
Tuluttut danskisullu saqqummiussisoqassaaq. Kalaallisut toqqaannartumik oqaluttaasoqassaaq peqataanerlu akeqanngilaq.
Workshopernermut ataatsimut marlunnulluunniit peqataarusukkussi qinnuigineqarpusi ingerlatsinermut siunnersortimut Jens Henrik Nielsenimut nalunaaruteqaqqullusi, jeni@(if you can see this please update your browser)nukissiorfiit.gl kingusinnerpaamik 1. august 2011.
Atlantikup avannaani biilit tungaatigut suleqatigiinneq
Pilersaarummi, El-mobility, 2010-mi aallartinneqartumi biilit innaallagiatortut assigiinngitsut atlantikup avannaani pissutsini silaannarnilu assigiinngitsuni atorneqarnerinit paasissutissanik assersuussinissaq siunertaavoq. Nukissiorfiit saniatigut Icelandic New Energy aamma Orkusetur Islandimeersoq kiisalu SEV Savalimmiuneersoq pilersaarummi peqataapput.
Paasissutissat sanilliunneqartussat tassaapput; kilometerit ingerlavigineqartut, agguaqatigiissillugu sukkassuserisimasat, angalaariaatsit, piffissat batteriit immerneqarfigisaat, innaallagiamik atuineq aserfallatsaaliinissamullu pisariaqartitsinerit. Tamatumunnga peqatigitillugu maani nunatsinni biilinik innaallagiatortunik ingerlassineq pillugu inatsisit attaveqaatillu piareersarneqassapput. Tamatuma saniatigut nunani pingasuni tamani workshopertoqassaaq, biilinut innaallagiatortunut ilisimasaqarnerulerumalluni.
Tamannaana tunuliaqutaralugu Nukissiorfiit Katuap ”Inersuaaraani” marlunngornermi aggustip ulluisa qulingiluaanni ulloqeqqata tungaanut workshopernissamut aggersaasoq. Workshopernermi Savalimmiunit, Islandimit, Nunatsinnit Danmarkimiillu bilinik innaallagiatortunik pilersaarummillu El-mobilitymik, kiisalu attaveqaatinik batteriilersuiffiusinnaasunillu misilittakkat pillugit saqqummiisoqassaaq.
Workshopernermut atatillugu biilit innaallagiatortut marlussuit assigiinngitsut allallu angallatit innaallagiatortut peqataasunit misilinneqarsinnaassapput.
El-mobility annerusumik pillugu uani paasisaqarit.
Brint atortulersuutitut
NAHA-p* Nukissiorfiillu suliassaqarfianni ualikkut Katuap ”inersuaaraani” workshopertoqassaaq, tassani misilittakkat arlallit sammineqassallutik. Nukissiorfiit Nunatsinni brintimut misileraammit siullerpaasumit misilittakkat saqqummiutissavai. Pilersaarummi nunatsinni erngup nukinganik innaallagissiorfinnit nukissaq sinneqartoorutaasoq brintiliornermut atorluarneqarsinnaanersoq taamaalillunilu suliffeqarfiup tunisassiornerani nukissaq ataavartoq annertusarneqarsinnaanersoq paasinarsisinneqassaaq.
Norgemit Newfoundlandimiillu peqataasut pilersaarummit Utsiramit Rameamiillu misilittakkatik oqaluttuarissavaat, pilersaarutini taakkunani sumiiffinni ungasissuniittuni anori brintilu ataatsimut innaallagissiuutitut atorneqarlutik. Islandimiut Islandimi inuiaqatigiit brintimik atuiffiulernissaannik isumaliutiminnik misilittakkaminnillu oqaluttuassapput.
Brint annerusumik pillugu uani paasisaqarit.
*) North Atlantic Hydrogen Association, NAHA (Nordatlantisk Brintforening) kattuffiuvoq kajumissutsimik suliffiusoq arlaannullu atassuteqanngitsoq, Atlantikup avannaani brintimik nukissiuutitut suleqateqarfiuvoq. Suleqatigiinnermi siunertaavoq najukkami misilittakkanik nunarsuarlu tamakkerlugu ilisimatusarnikkut angusanik paarlaaqatigiinnissaq, pilersaarutinik suleqatigiinnissamut periarfissaqartitsinissaq, kiisalu tamanut paasissutissiisarnissaq.
