Avatangiisit illersorniarlugit uuttuutinik ungasianiit nalunaarsuineq

Sarfannguani Sisimiut Kommunianiittumi atuartut Nukissiorfiit Nuummut tikeraarput. Nunaqarfimmi najugarisaminni misiliilluni suliniut annertunerusumik paasisaqarfiginiarpaat, taannami nunatsinni tamarmi ukioq 2014-mi uuttuutinik ungasianiit nalunaarsuisalernissami aallarniineruvoq.

Siulliupput
Maj 2007 Sarfannguani innuttaasut nunatsinni siullersaallutik innaallagissamik imermillu atuinermut uuttuutinik ungasianiit nalunaarsortakkanik ikkussuivigineqarput. Atuisut uuttuutai ukiumut ataasiarlutik nalunaarsorneqartariarlutik maannakkut minutsit 15-kaarlugit nalunaarsorneqartalerput atuisullu atuinertik naapertorlugu akiliisarput siumoortumik á contomik akiliigallartarnatik.

Misiligummik suliniut nunaqarfimmi innuttaasut iluatsilluartumik suleqatiginerisigut ingerlanneqarsimavoq. Uuttuutit taarsersorneqareernerisa kingorna innuttaasut arlallit kiisalu Sisimiut Kommuniat  qanoq atuitiginertik malinnaavigissallugu soqutiginnittupilunngorsimapput. Atuinerup eqqumaffiginerulerneratigut innaallagissamik imermillu atuineq annikilligajuttarpoq, tamannalu avatangiisinik illersuineruvoq.

Atuartut soqutiginnittut
Misiliilluni suliaq nunaqarfimmi soqutigineqarsimaqisoq atuartut anginerit Sarfannguit atuarfianniit ukioq manna Nuummi Qullersaqarfimmut juunip arferngani tikeraarneranni malunnaqaaq. Soqutiginneqalutik tusarnaarput Peter Kjeldmann-ip suliniut teknikkilu qanoq ittuunersoq pillugit saqqummiinerani.

Ilinniartut ataasiakkaat angerlarsimaffiinit kisitsisinik Peter takutitsimmat atuartut takusinnaalerpaat pitsaasumik ingerlasoqartoq.

Ataavartumik nukissiuuteqarnissamut piumasaqaatit
Innuttaasut eqqummaarinnerulernissaat pitsaanerusumillu kiffartuussiniarneq misiliilluni suliniutip siullermik anguniagarinngilaa. Ukiumi siullermi paasissutissat katersorneqartut misissoqqissaarneqartussaasimapput paasiniarlugu siunissami avatangiisinut illersuinerusumik ataavarnerusumillu nunaqarfimmi nukissiuuteqarnissami atortut qanoq ittut atorneqartariaqarnersut. Allaaserisami angusat atuarneqarsinnaapput uani ”Fjernaflæsning Sarfannguaq – Et udviklingsprojekt støttet af Grønlands Hjemmestyre” maj 2008-meersoq.

Allaaserisaq uani quppernermi aaneqarsinnaavoq.

Anguniakkat nutaat
Sarfannguani misiligummik suliniut suliniummut annertunerujussuarmut aallarniutaavoq. Nukissiorfiimmi anguniagaraa ukioq 2014 naatinnagu innaallagissamik imermik kiassarnermillu atuisut atuinermut uuttuutaat tamarmik uuttuutinik ungasianiit nalunaarsortakkanik taarserneqassasut.

- Taarsersuineq ingerlanneqaleruttorpoq. Uuttuutinik ikkussuisunit suleqatigiit maannamut uuttuutinit 60.000 missaaniittunit uuttuutit 3.500 taarsersimalerpaat, taama oqaluttuarpoq pisiniarnermut pisortaq Kent Skildal Peter Kjelmann peqatigalugu suliniummut akisussaasuusoq.

- Maj 2007-imi Sarfannguani misiligutitut suliniutip kingorna ukioq taanna septembarimi illoqarfimmi taarsersuinerit siulliit ingerlappavut. Tassalu Nuup ilaani Qinngutsinni, Kent nangippoq.

- Misiligutitut suliniutit taakku tamarmik iluatsipput. Ukiorlu manna martsimiilli Nuup nunaqarfiini uuttuutinik taarsersuivugut. Anguniagaavoq juullertinnagu Nuup Kommunia tamarmi ungasianiit nalunaarsortakkanik uuttuuteqalissasoq.
Anguniagarput tulleq tassaavoq Sisimiut nunaqarfiilu tamarmik ungasianiit nalunaarsortakkanik uuttuuteqalernissaat. 2009-p aasaanerani Uummannaq Upernavillu taakkulu nunaqarfii suliummi tulliussapput, Kent naggasiivoq.