26. januar 2010
Nukissiorfiit 1. februar 2010-mit systemimik nittartakkamik tunngavilimmik, sullitatta Internet aqqutigalugu nukissamik atuinerminnik malinnaanissaannut periarfissiisumik atuilissaaq.
Ungasianit atuarneqarsinnaasumik atuinermik immikkut uuttortaammik nutaamik ikkussivigitissimagaanni atuisutut februaarip ulluisa aallaqqaataannit atuineq internetikkut nittartakkatsinni malinnaavigineqarsinnaalissaaq.
Eqqumaffiginninneq sunniuteqartarpoq
Nukissamik atuineq misissullattaassallugu pitsaasuuvoq. Misilittakkammi paasinarsisippaat atuisartup atuinini eqqumaffiginerugaangamiuk nukissamik sipaarnerusartoq, tamannalu nammineq aningaasaqarnermut avatangiisinullu iluaqutaavoq.
Systemi nittartakkamik tunngavilik nutaaq atorlugu atuisartup inoqutigiit atuinerat pillugu paasissutissanik takusaqarsinnaalissaaq, allaat nalunaaquttap akunneranit nalunaaquttap akunneranut atuinermut tunngasunik. Taama iliornikkut atuisartup tunisassianik nukissamik atuisunik nutaanik pisinermi assigiinngissutaasut takusinnaalissavai nukissamillu pisariaqanngitsumik maangaannartitsineq naapertuutinngitsumillu ileqqoqarneq paasisinnaalerlugu.
Tamanut iluaqutaasoq
- Ungasianit atuaasarneq atuisartunut ingerlatseqatigiiffimmullu iluaqutaassaaq. Atuisartut pissutsiminnik allannguiniarlutik namminneq misileraasinnaapput ilungersuutimillu sunniutaat ingerlaannaq Internetikkut paasillugit. Suliffeqarfimmut iluaqutissaq tassaavoq uuttortaatinik tamarluinnarnik atuaajartortariaqannginnatta, nukissiorfiup pisortaa Svend Hardenberg oqarpoq.
Uuttortaatit ungasianit atuartakkat atorlugit aamma ungasianit ammaanissaq akiligassallu akilerneqanngippata pilersuinermik ungasianit matusinissaq ajornarunnaarpoq. Tamatuma kinguneraa uuttortaatinik matusinermut ammaaqqinnermullu akileraarutinik appaasinnaasimanerput, tamatumuunalu sullitavut sipaaruteqaqqipput.
- Systemi atortuuvoq atuisartunut aningaasanik sipaarutaallunilu silaannaap pissusiinut akisussaaqatigiinnitsinnik isumaginniffioqataasoq, Svend naggasiivoq.
Isumannaallisaaneq
Systemimi isumannaallisaaneq Nukissiorfiit pingaartittorujussuuaat. Taamaattumik ungasianit uuttortaateqarnerput tamarmi, tassunga ilanngullugu internetikkut nittartagaq danskit suliffeqarfiutaanni Kamstrup A/S-imit ineriartortinneqarsimavoq. Kamstrup nunarsuarmi nukissamik uuttortaanermut systemeqarnikkut aaqqiissutinik tunisassiortut siuttut ilagaat. Aamma paasissutissanut tamanut tunngatillugu isumannaallisaanermik isumaginnittuupput, kiisalu paasissutissat sullitanut tunngasut illersorneqarnissaat isumagisaralugu, allanit pissarsiarineqarsinnaajunnaarlugit. Tamatumunnga atatillugu Kamstrupip paasissutissatigut isumannaallisaaneq pillugu piumasaqaatit naammassivai.
Ilitsersuineq
Ungasianit atuarneqarsinnaasunik atuinermik uuttortaatitaarsimasut tamarmik systemi nutaaq taanna pillugu erseqqinnerusumik paasissutissartalinnik allagarsiumaarput. Internetikkut nittartakkatsinni aamma systemip qanoq atorneqarnissaanut ilitsersuut aaneqarsinnaavoq.
Piviusut:
Internetikkut nittartagaq nutaaq taanna aqqutigalugu nukissamik atuinermik misissuisinnaanissamut piumasaqaataavoq ungasianit atuarneqarsinnaasunik atuinermik nutaamik uuttortaateqarnissaq. Taarsersuineq taanna Nukissiorfiit 2007-imi aallartippaa, sullitattalu tamarmik kingusinnerpaamik ukioq 2012-imi nutaamik uuttortaatitaarsimanissaat naatsorsuutigaarput.
Uuttortaatit tamarmiusut affaasa missaat, tassa 47 %-it taarsersorneqareerput. Uuttortaatit nutaat Nuummi, Sisimiuni, Uumannami Upernavimmilu, taakkulu nunaqarfiini ikkussorneqareerput.
2010 naatinnagu Narsami, Qaqortumi, Nanortalimmi, Paamiuni Ittoqqortoormiinilu, taakkulu nunaqarfiini uuttortaatit tamaasa taarsersorsimanissaat naatsorsuutigaarput. Taakku nunatsinni atuinermik uuttortaatit tamarmiusut 66 %-iinik taarsersuinermut naapertuupput.
