4. oktober 2011
Erngup nukinganik innaallagissiorfiliornermut Iluissani 2010-mi aallartittumut piffissarujussuaq nukippassuillu atorneqarsimapput. Sulineq ilungersunartoq maanna erseqqissivoq. Erngup nukinganik innaallagissiorfimmik nakkutilliisoq Ole Kristensen sulineq pillugu oqaluttuarpoq:
Ilulissani erngup nukinganik innaallagissiorfiliorneq 160-inik sulisoqarfiulluni Nunatsinni sanaartornerit aallarteriikkat annersarigunarpaat. Tamatuma saniatigut sulisut amerlanersaasa sapaatit akunnerannut ulluni arfinilinni ullormut 12 tiimini sulisarnerat ilanngukkaanni sanaartornerup Ilulissani, illoqarfiup avannaatungaani nunaannarmi minnerunngitsumillu Paakitsumi Ilulissanit avannamut kangimut 50 km-isut ungasitsigisumi nunap qaani iluanilu erseqqissumik takussutissaqalernera pissutissaqanngitsuunngilaq.
Erngup nukinganik innaallagissiorfik
Nukissiorfittaa qaqqap iluaniissaaq, sullorsuit imermik kaavittunut kuuffiusut ilanngullugit. Nukissiorfik naammassippat sullorsuit 5,6 km-iussapput.
Sullorsualiortiterneq sivisusarpoq. Sapaatit akunnerannut 100 meteri qaartiterneqarsinnaavoq. Taamaattumik sullorsualiortut sanaartorfimmi siulliullutik sulilerput kingulliillu ilagalugit aamma qimassallugu.
Sullorsualiortunut suliassaq pingaarutilik tassaasimavoq putumik nukissiorfittaata inissaanik qaartiterinissaq. Sulineq taanna juulip qaammataani naammassineqarpoq.
Nukissiorfiliorneq ilungersunartuuvoq suliassaqarfinneersorpassuarnik akuuffiusoq. Inuit taqqamani sulisut aallarterlaajunngillat.
Ilungersunartut suliarineqartussaapput, nammineq sulianuinnaq pikkoriffeqarsinnaanngilaq aammali allat sulerinersut paasisinnaasariaqarlugu, suummi tamarmik imminnut ilarussuummata.
Maannakkorpiaq kaavittut pingasuusut atortui siulliit ikkussuutileruttorpavut.
Nukissiorfik ukiorpassuarni sakkortuumik ingerlatsiviunissamut sananeqarpoq. Nukissiorfik naammassippat tassaniinnaq savimerngit qajannaallisaatit 58 tonsit betonilu 2.500 tonsit atorneqarsimassapput.
Sullissisorpassuit
Sulisuinnaat sanaartorfimmi sulinngillat. Aamma sanaartortunut sullissisussaqartariaqarpoq. Paakitsumi sanaartorfimmut atatillugu illoqarfeeraliortoqarsimavoq inunnut 130-t missaanniittunut ineqartitsiviusumik.
Sulisut ullup ingerlanerani tiimit sisamakkuutaarlugit pikkunartunik nerisarnissaat kantiinami isumagineqarpoq. Sannavimmi errorsivinnit sulluliornermi qilleruterujussuarnik iluarsaanissamut ulloq unnuarlu piareersimasoqarpoq.
Sanaartornermut atatillugu angallatit pingasuupput, ilaasunik atortunillu sanaartorfimmut tassanngaanniillu angallassinermik isumaginnittuusut.
Umiarsuit angisuut Royal Arctic Linep umiarsuaataatut angitigisut kangerluup paavatigoorsinnaanngillat ikkaqalunilu amillunilu sarfartuummat angallatit minnerit kisimik aqqutigisinnaallugu.
Maanna erngup nukinganik innaallagissiorfiliornermi sulisut najukkameersut 21-upput, taakkunannga tallimat praktikertuullutik. Angallatini sulisut najukkameersuunerupput, tassami inuttaq ataaseq kisimi Nunatsinneersuunngimmat.
Maannakkorpiaq suli Paakitsumi Ilulissanilu sanaartorfinni ulapputtoqarpoq. Decembarip tungaanut sulisoqassaaq, tassani sulineq unitsinneqassalluni 2012-imilu upernaap ingerlanerani nangeqqinneqassalluni.
Suleqatigiilluarneq
Piffissap qiteqqunnerani killiffik oqaluttuarissagukku oqartariaqarpunga sulineq ingerlalluartoq.
Pilersaarummi sulisuusut suliaminnut pitsaasumik pissuseqarput ulluinnarnilu quiasaartoqartarpoq. Entreprenøri Nukissiorfinnit oqaatigisavut naalaarneqartarput pitsaasumillu sulisoqarpoq.
Erngup nukinganik innaallagissiorfiliornermi sulisut ilisimasassaannik misilittagassaannillu piumasaqaateqarfiusorujussuuvoq. Tamatuma kinguneraa nunanit assigiinngitsorpassuarneersut sanaartorfimmiinnerat, tamannali ajornartorsiutaasimanngilaq.
Allattoq: Ole Kristensen-imit, nakkutilliisoq
Paasissutissat
Napparutit maaji ikkussuunneqalermatali sanaartorfimmi sulisoqalertorsimavoq. Napparutit helikopterinik ikkussuunneqarput tamatumanilu Air Greenland-ip AS 350-erit helikopteriutai marluk aasap ingerlanerani tamakkiisumik sulisinneqarsimapput.
Illoqarfimmi innuttaasut takornariallu napparutit tulleriiaarlugit qaqqamukaassorlugit qulaassorneqartut takusarsinnaasimavaat. Napparut kingulleq aggustip naanerani napparneqarpoq. Napparusersuiffiup affaani ledningit silaannakkoortinneqartut naammassineqareerput affaalu aallartilluarneqareerpoq. Ukioq manna naammassinissaa ilimanarluinnarpoq.
Erngup nukinganik innaallagissiorfik 2013-imi ukiakkut Nukissiorfinnut tunniunneqassaaq 1. novem¬ber 2012-imiilli innaallagissiorfik Ilulissani innaallagiap aqqutaanut innaallagialersuileriissaaq. Innaallagiaq innaallagiap aqqutaatigut 50 km-eriusukkut illoqarfimmut nassiussuunneqassaaq. Pilersaarut naapertorlugu innaallagiap aqqutaa katillugit 139-nik napparutilik ukiut marluk ingerlanerini pilersinneqassaaq. Suliffeqarfilli Kroatiameersoq Dalekovod suliamik isumaginnittuusoq ukiumi ataasiinnarmi suliarinninniarluni aallarteqqaaraluarpoq.
Innaallagiap aqqutaani innaallagiaq 60 kV-iuvoq innaallagiarlu illoqarfimmut apuuppat 10 kV-inngortinniarlugu sakkukillisaavikkoortinneqassaaq illoqarfimmullu ingerlatinneqarsinnaanngorlugu. Sakkukillisaaviliorneq ima angusaqarfiutigaaq septembarimi qalialersorneqalissalluni illuullu ukiortinnagu matuneqassalluni.
