Illoqarfiit nunaqarfiillu imminnut ungasinnerujussuat peqqutigalugu sumiiffiit tamarmik akornanni atortussanik paarlaasseqatigiissinnaanngilagut. Ingerlatsinerit taamaattut taaneqartarput ”qeqertami ingerlatsineq”, tassaavorlu innaallagissamik, imermik kiassarnermillu tunisassiorneq tamakkiisumik najukkamiit ingerlanneqartoq.
2007-mi Qorlortorsuarmi erngup nukiliorfiup misiligutaasumik ingerlalernerani Qaqortoq Narsarlu nukissiorfimmit ataatsimiit nukimmik pilersorneqalerput. Erngup nukiliorfik taanna nunatsinni kisiartaasumik ataatsikkut illoqarfinnik marlunnik pilersuisuuvoq.
Illoqarfiit
Nukissiorfiit illoqarfinni inoqutigiit tamaasa innaallagissamik pilersorpai, illoqarfinnilu aqqaneq marlunni kiassaateqarfinniit innaallagissamillu kiassarnerit akisussaaffigalugit. Inoqutigiinnut illoqarfimmi erngup aqqutaannut attaveqartunut aamma imermik pilersuivugut, tassaapput illoqarfinni inoqutigiit amerlanersaat. Taamaakkaluartoq illoqarfinni aamma imiisiveqarpoq, atuisunullu taakkununnga imermik pajuttuisarpugut, ilaatigulli inuit namminneq imertartarfinni imertartarput.
Nunaqarfiit
Nunaqarfinnut katillugit 53-nut innaallagissamik pilersuivugut, 51-nullu imermik pilersuilluta. Qaqutigoortumillu toqqaannartumik illunut imermik pilersuisuuvugut, taamaattumik inuit namminneq imertartarfinnut imertartarput.
Uani takuneqarsinnaavoq tunisassiuutitta allattorsimaffiat. Taakku saniatigut innaallagissap erngullu aqqutai nuna tamakkerlugu ingerlataraagut.
Nunaqarfinni | |
Innaallagissiorneq | |
Innaallagissiorfiit | 53 |
Sillimmatitut innaallagissiorfik | 1 |
Innaallagissiorfiit katillugit | 54 |
| |
Imermik pilersuineq | |
Imermik pilersuiffiit katillugit | 51 |
Taakkunani 9 tarajuiaalluni imermik pilersuineruvoq* |
* Tarajuiaat tassaavoq immap imaanik tarajuiaalluni imermik imigassamik pilersitsineq.
