Nukissiorfiit pillugu

Nukissiorfiit, nukissanik tunisassiorfiup, suliaasa pingaarnersaraat ukioq taamaat ulloq unnuarlu  ulluni 365-ini innaallagissap sarfaanik, imermik kiassarnermillu innutaasunut tunisassiorneq siammartiterinerlu.

Tamanna pisarpoq najukkani 14-ini immikkoortortaqarfiit aqqutigalugit illoqafiit 17-it nunaqarfiillu 54-it pilersornissaat akisussaaffigalugu. Qaanaami Ittoqqortoormiunilu immikkoortortaqarfiit eqqaamiuminnut innaallagissap sarfaanut aqqutinik ikkussuisarnermut aammattaaq akisussaapput. 

Nukissiorfiit Kalaallit Nunaanni suliffeqarfiit anginersaasa ilagaat nunatsinnilu tamarmi 400-it missaannik sulisoqarluni, taakkunannga 80-it missaat Nuummi qitiusumik allaffeqarfimmi sulisuupput. Suliffeqarfiup qullersatut siuttui allaffissornikkullu aqutsisui qitiusumik allaffeqarfimmi inissisimapput.

Kalaallit Nunaanni Innaallaagissap Sarfaa pillugu Oqartussaneq akisussaaffigisatta aamma ilagaat, tassanimi innaallagissap sarfaanut atortut eqqarsaatigalugit oqartussaasutut suliassat assigiinngitsut suliarineqartarput.

Nukissanik pilersuineq inuiaqatigiit aningaasaqarnerat eqqarsaatigalugu imminut akilersinnaanerpaamik avatangiisinullu pitsaanerpaamik ingerlatissallugu kissaatigaarput, soorluttaaq oliamik isumalluuteqarneq annikillisikkusukkipput.

Taamaaliortoqassaaq nunatsinni erngup nukissiorfeqarnissamut periarfissaritaasut ilaatigut iluaqutigalugit. Ullumikkut erngup nukiliorfinnik pingasunik peqarpugut, Nuummut, Tasiilamut, Narsamut Qaqortumullu pilersuisunik. Erngup nukiliorfiit sisamassaat Sisimiunut pilersuisussap 2010-p aallartinnerani atulernissaa naatsorsuutigineqarpoq.

Erngup nukissiorfii taakku siunissamilu suliniutit nukissamik sipaarfiusussat allat suliffeqarfiup isumaginiarpai takorluugaqarfigalugillu.

Piginnittunut tunngasut nalunaaruteqarfigisartagarlu
Nukissiorfiit suliffeqarfiuvoq iluanaarutinit aningaasalersorneqartoq Namminersorlutillu Oqartussanit pigineqartoq aamma ukiumoortumik naatsorsuutit nunatta karsiata ukiumoortumik naatsorsuutaasa ilaatut ilanngunneqartarput. Suliffeqarfiup sulinera nukissamik pilersuineq pillugu Inatsisartut inatsisaanni nr. 14-kkut 6. november 1997-imeersutigut allaaserineqarpoq. Nukissiorfiit nalunaaruteqartartussaatitaavoq Ineqarnermut, Attaveqaqatigiinnermut Angallannermullu Naalakkersuisoqarfimmut.