Nukissiorfiit innaallagiamik atuinermut uuttuutaat nutaat ungasianit atuarneqarsinnaasut atorlugit sullitamut innaallagiamik pilersuinermik ammaasarneq matusisarnerlu sukkanerulerlunilu akikinnerulerpoq.
Uuttortaatitoqqanik taarsersuineq 2007-imi aallartippoq sullitallu tamarmik 2012-imi nutaanik uuttortaatitaarsimanissaat naatsorsuutigaarput.
Ulluinnarni atuarneqarsinnaalerput
Nukissiorfiit innaallagissap sarfaanut uuttuutai nutaat ungasianiit atuarneqarsinnaasut atuutilernerisigut uuttuutit Nukissiorfiit qitiusumik allaffianiit attaveqarfigineqarsinnaalerput. Imaappoq Nukissiorfiit qitiusumik allaffianiit uuttuutit ulluinnarni atuarneqarsinnaalerput kiisalu uuttuutit ammarneqarsinnaalerlutillu matuneqarsinnaalerput, inuk uuttuummut ornigulluni atuaajartortarunnaarsillugu. Akiligassat allagartaat allakkallu nukingisaarutit pisarnermisut suli nassiunneqartassapput.
Uuttuut
Uuttuut nalinginnaasumik ingerlagaangat uuttuutip qullia sungaartoq aappaluaartumik ikeqattaartarpoq. Qulleq sukkanerusumik ikeqattaaraangat sarfaq annertunerusoq atorneqartarpoq.
Matuneqarneq
Akiliisimannginneq namminerluunniit piumassutsimik qamitaaneq pissutigalugu uuttuut matuneqarpat uuttuutip qullia aappaluttumik ikumaneqassaaq. Tamanna ima paasineqassaaq, tassa uuttuut matuneqartoq. Uuttuutip qullia aappaluttumik ikumaneqarpat uuttuut ammarneqarsinnaanngilaq.
Ammaqqinneqarneq
Uuttuut ammaqqinneqassappat uuttuutip qullia qorsummik ikumaneqassaaq. Tamanna ima paasineqassaaq uuttuut ammaqqinneqarnissaminut piareertoq. Tamatuma kingorna illit nammineerlutit atuisutut uuttuut ammaqqissavat. Imatut ammaaqqittoqartarpoq igalaavaqqap ataaniittoq toortagaq 8-10 sekundini toorsimaannarneqassaaq. Toortagaq sumiinnersoq assimi takutinneqarpoq. Sekundit 8-10 qaangiuppata uuttuut seqquallalaassaaq, tassa uuttuut ammarneqarpoq sarfaqaqqilerlunilu.
Uuttuutaasivik
Uuttuut skaavimmi parnaarunneqarsimappat matuersaat arfinilinnik teqeqqulik najukkanni Nukissiorfimmi pissarsiarisinnaavat. Akerlianilli skaaviup uuttuuteqarfiup tunuani uuttuut matuersaat eqqortoq atorlugu parnaarunneqarsimappat inissiamik attartorfigisat attaveqarfigissavat.
