Qaammaqqut eqqortoq toqqassagaani – peeriuppat aamaartartoq, lysstofrøriuppat, peeri sipaarniut allaluunniit – apeqqutaavoq quleq pineqartoq sumi inissisimanersoq. Tassani aamma apeqqutaavoq sunik iluarisaqarneq. Innaallagissamilli sipaarniarnissaq siunertarigaanni , taava peerit sipaarniutit lysstofrørillu siullertut innersuunneqartariaqarput. Minnerunngitsumik qullit sivisuumik ikumatinneqartartut eqqarsaatigalugit.

Peeri aamaartartoq nalinginnaasoq
Peeri aamaartartoq akikitsuuvoq, ikumaneralu kissalaarlunilu iluarluni. Atuussinnaanerali sivikippoq innaallagissamillu atuineqqortuneranut sanilliullugu qaamanermik annertunngitsumik tunisisarluni: Peerit aamaartartut peerinut sipaarniutinut naleqqiullugit sisamariaammik sarfamik atuinerupput, nukiillu nalunaarsuiffiani E-mi F-imilu inissisimallutik. Nukiit nalunaarsuiffiat uani atuarsinnaavat.

Peerit aamaartartut qulliit sivikitsumik ikumasarfianni atornissaat innersuunneqarsinnaavoq, qalipaatillu pitsaasumik utersaarnissaat pingaaruteqartillugu. Soorlu tassaasinnaavoq nerriviup qaani allaniluunniit qalipaaffiusuni.
Utimut

Peeri sipaarniut
Peeri sipaarniut tassaavoq lysstofrøri A-peerimik aamma taaneqartartoq. Taakku nukimmik atuinikittuupput. Soorlu peeri sipaarniut 15W peeritut aamaartartutut 60W sakkortutigisumik ikumaneqartarpoq. Peerilu sipaarniut tallimariaammiit 15-iaammut sivisunerusumik atorsinnaalluni. Pisiaralugu akisuvoq piffissarli sivisunerusoq eqqarsaatigalugu imminut akilersinnaalluni.

Peerit sipaarniutit peerinik aamaartartunik atuiffiusuni ikkunneqarsinnaasarput. Peerit sipaarniutit ullumikkut pisiarineqarsinnaasut peeritut aamaartartutut nalinginnaasutulli pitsaatigisumik qaamasarput.

Maluginiaruk peeri sipaarniut ikinneqaraangami sikuntialuit qaamanissavini tikinniartaraa. Aammattaaq peeri sipaarniut minutsini marlunni utaqqeqqaarlutit aatsaat ikeqqissagakku. Pissutsit tamakku apeqqutaapput angerlarsimaffimmi peerinik sipaarniutinik qassit atussanerlugit aalajangiiniarnermi. Angerlarsimaffinni amerlanerpaani peerit sipaarniutit peerit aamaartartut arfineq pingasuniit qulinut taarsersinnaavaat.

Peerit sipaarniutit qaamanermik malussartartunut, qassuttaatinut assigisaanullu atorneqarsinnaanngillat. Taakkumi peerip sipaarniutip atuuffigisinnaasaa naalisittarpaat. Taamaakkaluartoq qaamanermik malussartartoqarpoq qassuttaateqarlunilu peerinut sipaarniutinut lysstofrørinullu tulluarsakkanik pisiassaqarpoq. Taakku atorsinnaavatit.

Lysstofrørit
Nukimmik atuineq eqqarsaatigalugu lysstofrørit peerinut sipaarniutinut naleqqersuunneqarsinnaapput. Peerit aamaartartut nukimmik atuineraniit pingasoriaammik arfineq pingasoriaammilluunniit annertunermik qaamaneqartarput arfineq pingasoriaammiit quleriaammik sivisunerusumik atasinnaallutik. Lysstofrørit arlalinnik pitsaassuseqarput pitsaanerpaamillu qalipaatit qinngorteqqittarlugit. Igaffiit nerriviisa qulaani atussallugit pitsaasuupput, naqqup ataani garagianiluunniit.

Lysstofrørit kompaktit
Lysstofrørit kompaktit lysstofrøritut iinnarput peqissimanermini naannerusumik ikumaneqarlutik. Isuata aappaani ikkuffeqarput qullerni immikkut ittuni taamaallaat atorneqarsinnaallutik, soorlu qullerni sulilluni atugassiani.

Reflektorpeerit
Reflektorpeerit qillertumik qallersimapput, peerinut nalinginnaasunut naleqqiullugit qaamanermik katersuutitsinerusarlutik. Killilimmik qaamaneqartussami atussallugit tulluartuupput. Peeriniit nalinginnaasuniit Wattimik atuinikinnerupput taamaatullu innaallagissamik sipaarutaasinnaallutik.

Peerit halogen-imik qaamanillit
Peerit halogen-imik qaamanillit voltimik atuinikinerussussatut sakkortusaateqartussaasutut pineqarsinnaapput aammalu nalinginnarmik voltimik atuisutut (230 volt) pineqarsinnaallutik. Qullernut qinngortartunut atussallugit naleqquppoq, peerinullu nalinginaasunut naleqqiullugit innaallagissamik sipaarutaalaarsinnaallutik. Inimi ataatsimi peerit halogen-imik qaamanillit arlallit atorneqartariaqarput, taamaalillutik sipaarfiunatik.

Maluginiaruk: Halogen-imik qaamanillit volt-imik atuinikitsut tamatigut iikkakkut qamittaammi qaminneqartariaqarput. Taamaanngippat sakkortusaavia innaallagissamik atuiuassaaq qullitaa ikumanngikkaluartoq.