Nillataartitsiviup qerititsiviullu nillissusissaat
Kaammattuutigineqarpoq nillataartitsivik 5° C-nik qerititsivillu -18° C-nik nillissuseqassasut. Nillataartitsivik qerititsivillu nillernerusunngortissagukkit maluginiassavat innaallagissap sarfaanik atuinerulissagavit. Pisoqqat nutaanit innaallagissap sarfaanik atuinerujussuusarput.

Nioqqutissat qerisut nillataartitsivimmi aassertakkit
Tamatigut pitsaasuusarpoq nioqqutissat qerisut nillataartitsivimmi aassissallugit. Aassiineq sivisunerusaraluarpoq nioqqutissalli pitsaassusia ajunnginnerulissaaq innaallagissallu sarfaa sipaarneqassalluni. Malugiuk nerisassat qerisut aassereernikuninngarnit uunneqartarnerat sivisunerujussuusarmat nukillu angineq atorneqartarluni.

Qerititsineq
Qerititsiviit amerlasuut qerititassat anginerusut qeritinnissaannut immikkut atortuligaasarput. Eqqaamallugu qerititsinermut immikkut atortoq atoreeraangakku qamittassagakku, taamaanngippat qerititsivik ataavartumik qerititsinialissammat.

Nillataartitsivimmik qerititsivimmillu pisineq
Nillataartitsivimmik nutaamik imaluunniit qerititsivimmik nutaamik pisiniassaguit nukimik atuinikitsut A+-imik imaluunniit A++-imik nalunaaqutsikkat toqqartakkit.

Siatsiviup kissarnera atorluartaruk
Siatsiviup (ovn) kissassaqqaarnissaa qaangiinnaruk. Siatsivik siatassallu ataatsikkut kissassakkit taamaalioruit nuki pitsaanerpaamik atussavat piffissarlu sipaarlugu. Qamereernerani kissassuseq atorluaruk. Siatap naammassinissaa 5-15 minutsinik sioqqullugu siatsivik qamittaruk.
Nerisassanik assigiinngitsunik arlalinnik siviatsivik ataatsikkut immertaruk. Nerisassiat assigiinngitsut susunninnerat allanut akulerunneq ajorpoq.

Nerisassat annikitsut
Nerisassat annikitsut mikrobølgeovnikkut miniovnikkulluunniit kissakkit uullugilluunniit.
Ajornanngikkaangat kogeplade brødristeriluunniit atortakkit siatsivik atornagu.

Kogepladip kissarnera atorluaruk
Imeq1-3 dl naammappoq. Igaq matujuk aalarlu matuatigut anialerpat sakkukinnerpaamut inissillugu. Aamma pasta imeq annikitsoq atorlugu qalaassinnaavat igarlu matullugu (igaq portusooq atortaruk). Pasta 100 gr.-imut imeq 3 dl atussallugu naammappoq.
Qamitsereernermi kissassuseq atorluartaruk – igaavit naammassinissat 2-5 minutsinik sioqqullugu kogeplade qamittaruk.

Igaffimmik (komfur) pisiniarneq
Igaffik nukimik atuinikitsoq A-millu nalunaaqutsigaq toqqartaruk.

Igat siatsiviillu toqqissut atortakkit
Igap naqqa equnganeqarpat imillissimappalluunniit kogepladi naammattumik kissassuseqartinniarlugu sakkortusisariaqartarpat sarfarlu anginerusoq atulissallugu.

Mikrobølgeovni atortaruk
Mikrobølgeovni kogepladimit atorumanerusarukku piffissangaatsiaq sipaassavat sarfarlu atukkat annikinnerussalluni. Mikrobølgeovni siatsivimmit (ovn) nalinginnaasumit atorumanerusarukku piffissarujussuaq sarfarlu annertooq sipaassavatit – nerisassat annikitsukkuutaat (inunnut 3-4-nut) igasarukkit.

Kaffiliuut uunaavillu sarfatortoq atortakkit
Kaffiliuut uunaavillu sarfatortoq ”sipaarutissatsialaapput". Igaffimmut sanilliullutik sarfap affaannaa atortarpaat. Uunaaviup sarfatortup imermut uuttuutaa atortaruk imeq atugassat kisiat qalaattassagakku.

Nillujuitsoq atortaruk
Kaffi inerniariarpat nillujuitsumut nuuttaruk kaffiliuutip uunassimaartitsisuani kissalaarusaartiinnarnagu. Kaffi nalunaaquttap akunnera ataaseq tassani kissalaartinneqarpat sarfaq atugaa literimik ataatsimik kaffiliornertut sarfamik atuiffiussaaq.

Aalap milluaasua sakkukitsumiitsittaruk
Aalap milluaasua sapinngisamik ima sakkukissusilertaruk igaarsunni kisiat peersinnaangorlugu. Aalap milluaasua sakkortunerpaamiikkaangami sakkukitsumiitsitsinermut sanilliullugu sarfap 1½-ianik annertuneq atortarpaa.

Igaarsunnilersinnagu aalap milluaasua aallartittaruk
Aalap milluaasua sunniuteqarnerpaasarpoq igaarsunnilersitsinnginnermi aallartereertarlugu igaffiullu matua init ilaannut atasoq ammatittarlugu. Tassannga silaannaq supoorisussaq pissarsiarineqartarpoq igaarsunni siammartinnaveerlugu.

Aalap milluaasuata filteria salittaruk
Eqqaamajuk filteri qaammammut ataasiarlutit orsuiarlugu salittassagakku. Filteri annerusumik minnerusumilluunniit milinngalersimagaangat aalap milluaasua sunniuteqassappat tamakkersartinneqartariaqassaaq sarfarlu atugaq annertunerulissalluni.