Saaffiginnittarfik atuisartunit apeqquteqarumasunit sianerfigineqallattaartarpoq imaluunniit akuttunngitsunik saaffigineqartarpoq. Aajuku apeqqutigineqarnerpaasartunit tigulaakkat akissutaallu immaqa apeqqutigerusutannut akissutaasinnaasut.

Innaallagissap sarfaanik imermillu pilersuinerit matuneqarsimapput. Ammaqqissinnaavisigit?
Aap, kisianni akileeqqusissut akilereerukku. Ilaannikkut imatut pisoqartarpoq, tassalu atuisut ilaat akileeqqusissut tigusartik kingulleq akilersimasarlugu, kisianni siusinnerusukkut akileeqqusissummik akiliisarsimanatik.

Innaallagissap sarfaanik imermillu pilersuinerup ammaqqinneqannginnerani Nukissiorfimmut akiitsut tamarmik akilereersimasariaqarput.

Akiligassat amerleriaataannik akileeqqusissumik tigusaqaruma, taakku akilersorsinnaanerpakka?
Aap, akilersuinissaq isumaqatigiissutigineqarsinnaavoq, kisianni aatsaat akilertakkavit aalajangersimasut marloriaataat sinnerlugit akiligassaappata.

Assersuutigalugu qaammatit tamaasa 500 kr.-nik siumut akiliisaruit akiligassallu amerleriaataannik 1010 kr.-inik akileeqqusissummik tigusaqaruit, akiligassaarunnissavit tungaanut qaammatit tamaasa aningaasanik aalajangersimasumik annertussusilinnik akilersuisinnaavutit.

Isumaqatigiissut unioqqutikkukku isumaqatigiissut atorunnaassaaq akileqqusarlu tamakkerlugu akilerneqassalluni, taamaattoqanngippat pilersuineq matuneqassaaq.

Akileeqqusissutip akilernissaa kinguartinneqarsinnaava?
Naagga, kinguartitsisinnaanngilatit. Eqqaamallugu piffissaatillugu akiliisassagavit kingusinerpaamillu ulloq akiliiffissaq kingulleq’ akileeqqusissummi allassimasoq malillugu.

Sooruna uanga akiligassat amerleriaataannik akileqqusissummik pisartunga, uffa allat aningaasanik pisassaqartartut?
Atuisut uuttuutinik pisoqqanik suli pillit Nukissiorfinnit ukiumut ataasiarluni atuaaffigiartorneqartarput.

Innaallagissap sarfaanik, imermik aamma/imaluunniit kiassarnermik akilersimasannit atuinerusimaguit atuineruneq pillugu akileeqquneqassaatit. Imaakkami allat akilersimasaminnit atuinikinnerusarlutik taamaattumillu aningaasanik utertitassaqartarlutik.

Ukiup ingerlanerani atuinerit annertusissasoq naatsorsuutigigukku akiligassalu amerleriaataannik akileeqqusissut piumanngikkikku pitsaasuussaaq najukkanni Nukissiorfiit allaffiat attavigigukku qaammammullu siumut akilertakkatit qaffatsillugit.

Uanga inissiami nutaatut atuisunngornera siarngutigisinnaavara akiliisartussatullu imminut nalunaarutigalunga?
Naagga, oqarasuaat atorlugu atuisunngortutut atuiunnaartutulluunniit imminut nalunaarutigisinnaanngilatit. Atuisunngornermi atuisuujunnaarnermiluunniit immersuiffissaq oqaasertalersugaariigaq immersussavarput taannalu ataatigut atsiorfigissavat.

Inissiap aniserfiginerata iserterfiginerataluunniit kingorna immersuagassap oqaasertalersugaariikkap piaartumik immersornissaa pingaaruteqarpoq. Immersuiffissaq oqaasertalersugaariigaq uani aajuk. Eqqaamallugu immersuiffissat tamaasa immersussagakkit, tamannami ilinnut uatsinnullu naggaterpiaatigut iluaqutaassaaq.

Inummik inissiamik attartorpunga atuisutullu nalunaarutigerusullunga. Qanoq iliussaanga?
Illit inullu taanna inissiamik attartortitsisoq atuisutut atuiunnaartutulluunnit immersugassaq immersussarvarsi, imaalillugu illit atuilersutut attartortitsisorlu atuiunnaartutut nalunaarutigalugu. Immersukkami marluullusi atsiornissarsi pingaaruteqarpoq.
Immeruiffissaq aajuk uani.

Akileeqqusissut uannut tunngasoq kommunip akilersamanerlugu?
Atuisut ilaat innaallagissap sarfaanik, imermik kiassarnermillu atuinertik kommunimut akilersittassallugu kommunimut isumaqatigiissuteqartarput. Manna piumaneruarput illit kommuni toqqaannartumik saaffigissagit, akileeqqusissut ilinnut tunngasoq kommunip akilersimaneraa apeqqutigissagukku.

Nukissiorfimmit aningaasanik pisassaqarnerlunga?
Erseqqissaatigissavarput atuisut aningaasanik pisassallit tamatigut allakkatigut nalunaarfigineqartartussaammata. Tamanna ukiumut ataasiarluni pisarpoq illit uuttuutit/uuttuutersi atuaaffigineqareeraangat.

Eqqaamallugu atuisunngortutut nalunaarnermut immersuiffimmi bankkontonormut nalunaarutigissagakku, taakku illit kontonnut toqqaannartumik ikiniassagatsigik.
Uuttuummik nutaamik ungasianiit atuaaffigineqarsinnaasumik peqaruit qaammatit atuinerit eqqorlugu akilertalissavat taamaattumillu aningaasanik uatsinnit pisassaqartassanngilatit.

Uuttuutit qaqugu atuaaffigineqassappat?
Sumi najugaqarnerit apeqqutaatillugu uuttuutit atuaaffigineqartarput. Nukissiorfiit illoqarfinni nunaqarfinnilu tamani atuaajartornissat agguataartarpaat. Qaqugu atuaajartortoqarnissaa paaserusukkukku najukkanni Nukissiorfiit allaffiat attavigissavat. 

Nutaanik, ungasianiit atuaaffigineqarsinnaasunik uuttuuttitaarsimasut eqqarsaatigalugit taakkunani qaammatit tamaasa atuaaneq qarasaasiakkut pisarpoq.

Nukissiorfimmi akiliisinnaanerlunga?
Naagga, najukkani allaffitsinni karseqartanngilagut. Taamaattumik akileeqqusissut banki imaluunniit allakkerivik aqqutigalugu akilerneqartassaaq.

Kajumissaarut
Atuisut tamaasa kajumissaarpavut akiligassanik akilersuisarfimmut (betalingsservice) ilannguteqqullugit, aningaasat qaammatit tamaasa illit kontonnit isumamik ilanngaatigineqartarniassammata. Aaqqissuussineq taanna pillugu uani atuaruk.