Aningaasaqarnermut pisortaq nutaaq

Claus Andersen-Aagaard 36-inik ukioqarpoq pilersaarusiornermi, aaqqissuussaanermut aqutsinermullu cand.merc.-itut ilinniagaqarnermik tunngaveqarluni. Claus Royal Arctic Line A/S-imi controllerinut pisortatut atorfimmeersuuvoq Kalaallillu Nunaanni ukiut 5-it missaanni najugaqarsimalluni.

”Aningaasaqarnermut pisortatut atorfiup inuttalerneqarnerani pingaartissimavarput piukkunnartumik nassaarnissarput Nukissiorfiit suliffeqarfittut niuernerpalaartumik aamma ataavartumik tunngaveqarluni ineriartornerani ineriartortitseqataasinnaasumik”, Nukissiorfiit pisortaanerat Michael Pedersen nalunaarpoq. “Clausi ukiuni arlalinni kalaallit suliffeqarfiutaannik allamik ineriartortitsinermik suliaqarsimavoq angusaqarluarluni. Qilanaaraarput Clausip aningaasaqarnermi, niuernermi ineriartortitsinermi aamma sulisunik ineriartortitsinermi piginnaasai pitsaasut atulernissaat, Nukissiorfiit ineriartortinneqarnerannik pitsanngorsaanissamut sullittakkatsinnut iluaqutaasumik”, nukissiornermi pisortaaneq Michael Pedersen oqarpoq.

” Uanga Nukissiorfinnut pinissara, kiisalu Kalaallit Nunaanni pilersuinermut attaveqaasersuutinik pingaaruteqarluinnartunik suli ineriartortitseqqinnermut tapertaanissara, assut qilanaarivara”, Claus Andersen-Aagaard oqarpoq. ”Ingammik qilanaarivara aningaasaqarnermut tunngatillugu niuernerpalaarnermut tapertaanissaq aammattaaq inunnik ineriartortitsinissaq toqqissisimanartumik avatangiiseqarluni, taamaaliornikkut immikkoortortaqarfinni suleqatigiit imminnut ataqatigiissutut aamma ingerlalluartutut atuutilissammata. Neriuutigaara Vestas Wind System-imi aamma Royal Arctic Line A/S-imi misilittakkakka atorlugit Nukissiorfiit pitsaasumik aamma pissanganartumik ineriartornissaa peqataaffigisinnaassallugu”.

 

Claus Andersen-Aagaard Nukissiorfinni siullerpaamik sulissaaq 14. augusti 2017.